Distrito 6, 7 ukanakanx warminakar ñanqhachawinakax jilxatatap yatiyapxi

Servicio Legal Integral Municipal (S.L.I.M.)  Viacha markat  Distrito 6 ukhamaraki Distrito 7 ukanakan irnaqirinakax irpirinakap tuqix qhanachawayapxiwa, sapurunjama kullakanakar kuna  ñanqhachawinakas, jiskachawinakas, jan ukax chhuxrinchawinakas utjaspa ukax  kamachinakarjam amuyt’ayasin yanapapxatapa.

Ukhamakipanx aka  Servicio Legal Integral Municipal (S.L.I.M.)  Viacha markatx Distrito 6 ukhamaraki Distrito 7 ukanakan utjkipanx  Sub Alcaldía Tilata tuqin ut’ayatawa. Uka tuqin qamasir kullakanakar kunayman ñanqhachawinak utjatapat katuqata sasinaw  uka taypin irpirinakax qhananchapxi. Ukampis Lic. Beatriz Chamaca uka S.L.I.M. tuqin irnaqirix sarakiwa, kullakanakar ñanqhachawinak utjatapatx, mimarat sipanx jichha maranx  sapa patakatx phisqharuw jilxatawayi. Kullakax yatiyiwa mimarax  mara tukuskamax  187 casos ukhaw katuqatana jichha maranx aka llamayu (mayo) phaxsikamax 63 casos ukhaw katuqataxi.

Kullaka   Beatriz Chamaca sarakiwa, uka jilxatawix utjiw  amuyatanx aka urunakanx walja kullakanakax kuna ñanqhachawinaks  katuqapxi ukhax jank’akiw yatiyjapxi, ukampis  nayra maranakanx inas jan yatiyapkchinti jan ukasti jani kawkharus yatiyataspa ukanakats uñt’atakchinti.