El Alto markanx 30 urunakaw llakinktan sasin ut’ayañ amtawayapxi

Universidad Pública de El Alto  tuqinkiri yatichirinaka,  yatiqirinaka ukhamaraki  irnaqirinakax wasuruw mayiwinakap ist’atañapatakix qhurump arsusiwayapxi. Jupanakax mayiwayapxiw Ley 195 Coparticipación Tributaria kamachix  turkatañapa ukhamarakiw  aka mara jikstañataki qullqi tuqi aka jach’a yatiqañ utaru yanapatañapa mayiwayapxi.

Ukhamakipanx  thakhinak sit’antawayapxi, ukatx pallapallanakax uka thakhinak sit’arañatakix gas sata k’ask’a ukampiw warsuwayapxi,  ukhamataw ch’axthaptawir puriwayapxi.  Ukhamakipanx  Carrera de Comunicación Social ukatsti Universidad Pública de El Alto  jach’a yatiqañ utan mayni yatiqirix  jiwat uñsyawayi. Uka tuqitx  yatxatawinakax sarantaskakiniw sawayapxiwa.

Ukham jiwata utjawaykipanx,  khititix Concejo Municipal de El Alto tuqin irpiri Antioco Cala sawayiwa,  nanakax mä tantachawi tuqix aka El Alto markanx amtawayapxawa kimsa tunka urunaka  llakinktanwa sasina ut’ayaña,  kunatix janiw ukhamax utjañapakiti sasinaw arsuwayi.