Expo Feria Tri-Nacional de Camélidos Sudamericanos 2018 qhathuw utjani

Bolivia  Departamento de La Paz ukanaw Municipio Charañax jikxatasi,  ukasti qurpasiwa  khaysa  Chile ukhamaraki Perú anqaxa markanakampi. Ukampis uka Charaña markanx qamasirinakax sapxiwa, janiw kunas ukanx achkiti jan ukasti uywachawimpikiw qamasipta juk’ampacha qarwa ukhamaraki allpachu ukanakakiw uywasita.

Ukhamakipanx uka  uywachawir ch’amanchañatakix sapa maranjamaw mä qhathu wakt’ayapxi. Uka qhathux  Hito Tripartito Charaña tuqinaw phuqt’asi. Ukansti sapa maranjamaw kimsa urunaka qhathux phuqhayata, sapa uruw mä marka uka qhathu irpti.  Ukanx kimspach markataw kunaymani qarwa,  allpachu uywanaka,  p’itatanaka,  manq’a phayt’atanaka juk’ampinaka uñacht’ayapxi.

Jichha marampix uka qhathux llätunkiri  kutiw phuqhasiwayxani. Ukampis uka tuqinkiri  Alcalde jilata Martin Villalobos sarakiwa, chiqasa uka qhathux wakichataw ukhamana  taqinis uñt’apxañapataki kunjamas ukan qamasipta ukatx kunjamas uka qarwa allpachunakax  uka tuqina uywataraki.