Wawanakan urupaw amtasi

Bolivia markanx sapa  tunka payani urunak maykipkipana aka qasawi (abril) phaxsinx  wawanakan urupaw amtasi, ukasti  mä waranqa  llatunka  pataka  phisqha tunka payani maratpacha (1952) jichhurunakamaw ukham phuqhata. Uka maranx Organización de Estados Americanos  uka kipkaraki UNICEF   uksankirinakax  qillqantawayapxanwa Principios Universales del Niño sata ch’amanchawi ukhamat wawanakar arxatañataki, kunatix  uka pachakamax aka uraqpachanx wawanakax t’aqhisiyata, ñanqhachata,  jan yäqata ukhamaw jikxatasipxatayna  ukanakar thurt’añatakiw ukham ch’amanchawayapxana.

Ukhama amtaskipanx qharurux kunayman tuqinakanaw jupanakarux wali  q’ayacht’atani ukhamaraki jach’anchatani. Kunayman  yatiqañ utanakana  uka kipkaraki utjawinakans wawanakat amtasiñatakix walirakiw  wakichapxi. Ukañkamax  jupanakan yäqawinakapa  ch’ullqhiñchañatakix ukhamaraki  mayiwinakapas ist’atañapatakix aka markasanx Asamblea Legislativa Nacional, Asamblea Legislativa Departamental kikiparaki Consejos Municipales ukanakanx jupanakaw tantacht’asipxi ukatx kunayman amtawinak ch’umstayasinx  uksankiri irpirinakaruw  uka amtawinak qillqsut luqtawayxapxi, ukhaman   phuqhayatañapataki.