29 maranaka ut’asitapa Waldo Ballivián amtani

Aka departamento de La Paz  tuqinwa jikxatasi suyu Pacajes uka taypinx municipio Waldo Ballivian Tumarapi ukarakiw ut’ata. Jichhax  kamachinakarjamax aka  municipio ukax pä tunka mayani urukipana anata ( febrero) phaxsina mä waranqa  llatunka pataka  kimsaqallq tunka  llatunkani  kamachirjamaw ut’asiwayi. Uka pachanakanx  jiliri irpirjamax aka Bolivia markasanx  Víctor Paz Estensoro jupaw irpxaruskana. Ut’asiwayiw akniri cantones ukanakani: Waldo Ballivian, Tumarapi, Tomata. Ukanx akniri comunidades: Viluyu, Viloco, Poke, Taypuma Centro ukanakaw jikxatasi.

Aksa tuqinx achuqt’ayataw jilpachax kunatix  ch’uqi, jupha, trigo, apilla, ulluku juk’ampinaka ukhamarakiw uksanx uywasitax  iwija, waka juk’ampinaka. Aka  municipio ukax suyu Aroma ukampiw qurpasi.

Aka municipio ukana irpiripa alcalde municipal Néstor Justiniano  Rojas Salluco  jupax qhanancharakiwa aka  maranx pä tunka llatunkani maranaka municipio Waldo Ballivian  ut’asitapata amt’atani, ukasti jutiri willkuru tunka phisqhani urunakakipana aka qasawi (abril) phaxsina wakt’ayatarjama amt’apxani,  ukatakix  taqiniruw jawillt’awarakixa.