Alerta naranja ukankaskakiwa

Aka urunakanx pachax amuyatanx turkatawa, kunatix mä aktjamataw jallus purinti,  juyphis juyphinti,  lupis wali ch’amamp lupt’anxasinx ums wañsuyxi ukhamaw utji. Ukhamakipanx  aka urunakamas jallus purintakipuniwa. Yamakisa jach’a markanakanx  umax  jawiranakata,  kunayman tuqinakanx   phullchhiriwa ukasti  q’añu t’unanaka  lluparantatapata.

Ukhamanaka utjkipanx aka EL Alto markanx   khitinakatix Dirección de Gestión de Riesgos  satakis uksankirinakax qhananchawayapxiwa aka markanx  alerta naranja satakis ukankaskakiña, kunatix ukhamarjamax  jasakiy  markachirinakarux yanapt’atachi ukham qhananchawayapxi,  ukasti kunapachatix  umanakas inasa utanakaru mantchi, jawiranakas phullchhirchi, thakhinakas juriptchi, uka pachanakana.