Amparamp sawt’iri, p’itiri ukhamaraki ch’ukurinakax nuspkañanak irnaqapxi

Aka qullasuyu markasanx kunayman tuqinakanaw walja kullaka jilanakax  sawusina, p’itasina, ch’ukusina nayrar sartapxi. Jupanakax kunayman lurt’anakx muspkañanak irnaqapxi. Ukampis  jupanakax jilpachx utjawipan irnaqapjixa. Ukatsti yanapanak jupanakax mayipxi, ukhaman anqax markan uka irnaqatanakapax alxatañapataki.

Periódico Digital “San Gabriel” aruskipiw kullaka Angélica Mitma jupampi, jupasti Oruro markatawa. Jupax tawaqitatpacha qarwa ukhamaraki allpachu t’arwata qapusina, p’itasina  irnaqatapa qhananchistu. Ukampis jichhurunakax jupax  wila masinakapamp chikt’at irnaqatapa yatiyistu. Aka urunakax jupanakax  kapachitunaka, wayaqanaka, qullqi imañanaka, juk’ampinaka lurapjixa.  Angélica Mitma jupasti, qhananchistuwa uka irnaqatanakapax  Santa Cruz markaru, Chukiagu markana juk’amp tuqinakana alxatañapataki kunayman qhathunakaru apapxatapa. Ukatsti jupax wakisispaw yanapawinaka utjañapa ukhaman  anqax markanakarus alxatañapataki mayiwayi.